Namangha ang mga nanonood sa "Eat Bulaga: Sa Tamang Panahon" nitong Sabado nang magawa ni Wally Bayola na gampanan nang sunod-sunod sa loob ng ilang minuto ang tatlong karakter sa kalyeserye na sina Lola Nidora, Duhrizz at Rihanna.
Mula sa karakter na si Lola Nidora na mahilig magpayo, ilang saglit lang ay nakapagpalit na ito ng anyo para gampanan naman si Duhrizz, ang kontrabidang apo ni Lola Nidora.
Malakas na "no!," ang naging tugon ng mga nanonood sa Philippine Arena nang magtanong si Duhrizz kung mas bagay siya kay Alden kaysa kay Yaya Dub.
Matapos mag-sorry at magpaliwanag na nagawa niyang maging masama dahil sa pag-ibig kay Alden, umalis si Duhrizz at bigla namang sumulpot naman ang karakter ng mayordoma ni Lola Nidora na si Rihanna.
May ipinakita ring footage sa wide screen na sabay-sabay na nag-uusap at magkakasama ang nasabing tatlong karakter na ginampanan ni Wally.
Dahil sa ipinakitang bilis ni Wally na magpalit ng karakter at husay sa pag-arte, dumagsa ang papuri sa kaniya ng netizens.
Bukod sa may mga nagmungkahi na dapat mabigyan ng award si Wally, may nagtanong din kung triple kaya ang talent fee ng aktor dahil sa mga karakter na ginampanan niya.
- FRJ, GMA News
source: gmanetwork.com
